a b c d e f g h i j k l m n o p q r s t u v w x y z 0 1 2 3 4 5 6 7 8 9 #

tsuki no me - psyco m lyrics

[paroles de psyco m “tsuki no me”]

[المقطع الوحيد]
نعيشو مع عباد صبورة كحلة ضلمة ما تضويش
المخاخ مخدرة ناس كي البكمة تتكيف حشيش
كيف الأوباش تاخو بلاش تسمع منهم ما عنديش
كيف تاقف اليدين تتمد كي تطيح لكلها ما تراتيش
الميت حفرولو قبر والحي حفرولو بياج
حتى أقرب العباد ليك تخليك نهار لي تحتاج
فلوسك تحتك يقدسوك ويلبسوك التاج
تعمل لحّاسة وطحانة تمشي وراك في كورتاج
العباد في بلاصة الدم في عروقها يجري القيح
المرض تنشر بين البشر وما فماش تلقيح
أول درس تتعلمو في الدنيا وقت لي تطيح
الزمرة تخلي وراها الصيد وقت لي يطيح جريح
تعلّم عيش وحدك لهنا لكلها تبيع الكلام
حتى خيالك يخليك كيف تدخل في بلاصة ظلام
اليوم البشر ولّا أكبر نقطة استفهام
كان شفت الرجلة فيق من النوم خاترك تحلم في منام
القلب، ماعادش يحس كساح ولا محلّف
القلب ولّا كي الفحمة الكحلة بالصديد مغلف
هاذاكا علاش كي تحب حاجة من عبد يبدى يتلّف
ما تشوف وجهو كان نهار لي يجيك وقت يحب يتسلّف
الطحين ولّا عبادة كي الدين عملولو سجادة
العبيد تركع للسادة في المعبد لي اسمو المادّة
كان جا السبور قوادة راي كلها لابسة قلادة
حد ما يبدل بحثو لكلها مازالت فيه شادّة
كذب لي قال العبد يتبدل كي ياخو دروس
هوني فما كان الفلوس لي تبدل النفوس
مادام في القلب حب المادة مطبوع ومغروس
يقعد البشر بالسلاسل في الطمع محبوس
لا بغرك الناس لي طلعت ولات زروس
تفرج على الزمان كيفاش ياكلهم كيما السوس
الدينار ولّا يتعبد وعملولو طقوس
شنية الحكمة تكسب الدنيا و تموت منزوس
شنية الحكمة عايش وانتي تجهل سبب الوجود
العمر يجري بيك و تنسى بلي وقتك معدود
هوني الحرام متوفر، الحلال ولّا مفقود
عايش معاهم حاسس روحي مسلسل بالقيود
نغزر في جو العباد نحس روحي مانيش كيفهم
كاينهم جثة تمشي حتى لين ولّيت نعيفهم
تحس روحك كي الشعلة لي طفات و بدات تغيب
حتى بين أقرب العباد ليك تحس روحك غريب
ولّيت نتمنى نمشي بعيد نطير فوق السحاب
العباد لازمهم بلاكة ممنوع الاقتراب
تخالطهم في مخك يولي عندك اضطراب
حتى “اون سامبل ديسكوسيون” معاهم ولات عقاب
ماش عارف مرضت الروح ليوم ولا مرض الجسد
قداش باش تصبر حتى مع الوقت الأجبال تتهد
اليوم ما تلقى حد، نهارت لي تشتد
لكلها ولّات تتمنى ديما قدامك تتسد
يشوفوك مختلف بيناتهم كيف تعيش بقدرك
تتلفت تلقى أقرب أصحابك في ظهرك غدرك
كي تعكس الدنيا لي بضحكة في وجهك يصبرك
هو بيدو تحتك لي قاعد يحفرلك في قبرك
اليوم الجرح يتحل في بلاصة لي يتلم
القلب يلوّج باش يفرح ما يلقى كان الهم
ولّينا نعيشو قصة ما يكتبها حتى قلم
قصة في كتاب بلا غلاف عنوانو ألم
تحصرنا بين الورق متاعو ضعنا بين الحروف
كل واحد منا تحصر في السطر بمعنى ماش معروف
كيفاش تفهم و تقرى المعنى و العينين ما تشوف
خاتر الحروف مكتوبة بالحبار لي يخليك مكفوف
كتاب مفتوح والريح تطير في الصفحات
برشا كلمات تبدلت فيه وحروف تنحات
الثقة والأمانة، المحبة، الرجلة والصدق
لكلها معاني معادش موجودة فيه تمحاة
و حياتك تقدر توفى هنا في وسط الكتاب
الموت ما تشاورش قداش هزت من واحد قبل ما تاب
كتبتلو نهاية ما ستناتوشي لين شعرو شاب
هزتو لبلاصة بعيدة وحدو وين ما تفيد أحباب
في هالبلاد أبسط طموح تتمنى تعيش فارح
تتمنى تعيش نهار جديد مش كيف لي عشتو البارح
أما القلوب كحالت والعباد كلامها جارح
كي الذيب لي كلا الغنم ومشى يبكي مع السارح
الدنيا كل مرة هنا تعطينا امتحان
ينجح فاها لي فسكا، قرا دروسو وتخرج طحان
بالشهادة فرحان، عايش فأوهام و سرحان
حتى يجيه ملك الموت و يقولو ان الوقت حان
عارف لي الدنيا ممر والآخرة مستقر
حتى لي عايش في قصور آخرتو حفرة في قبر
هاذاكا علاش اليوم وليت نحير في البشر
كيفاش بالدنيا يتعمى يطغى و يعمل الشر
كان جا بيدي نبعد عايش بيناتهم مضطر
فديت ملي سرق نهب كذب وخان وغدر
الوجيعة تتسربى كي البيضة كل يوم نشم سطر
عايش في بلاد مسكرة كي الحبس لي بلا مفر
الوردة تذبل وقت لي يبدا داير باها الشوك
تولي تطرح سؤالات وتغرق في الشكوك
تسأل على النحل والفراشات قلها صعيب يشوفوك
عروقك في تربة غالطة كي الميت في صندوق
صعيبة تحب تتنفس و انتي صدرك مخنوق
في بلاد بلا حقوق وانت تحب تغزر الفوق
تهز راسك تحلم تستنى حتى تتعدى الغيوم
كي تصفى تلقى السماء كحلة مافيهاش نجوم
قداش باش تقعد تدعثر تقعد تطيح وتقوم
قداش باش تقعد حاصر النفس وانتي اللوطة تعوم
بين شعب محكوم وين الظالم يحكم في المضلوم
وين الدولة تسربي في العقار لي ترد البدن مسموم
المبادئ غبرت كي السّراب في واقع مزيف
والطحين هوني تلون بكل ألوان الطيف
الطموح ماعادشي خدمة ليوم ولا ورقة و طريف
الشباب نقم شي ما فهم يحب ينسى و يتكيف
تحت الحيط بالدروق مخدر ورأسو تحت السيف
والمسؤول ماهوشي معدل مشى في فواياج يصيف
فما شكون عليه مصدر كي سرق خرج نظيف
في بلاد القانون و الدستور لهنا لا تسأل كيف
البلاد ولات تعيف، مسكرة فين تتلفت
طريقنا معبي لكلو حفر والدولة تقول مزفت
قالولنا لا فما فسفاط لا ملح لا نفط
عنا كان النواب لي تلحس و كان الوزرة تعفط
ووصلت الناس لي قففت والناس لي باعت الشرف
العباد لي رضات براسها اللوطة هنا و كلات الكف
رضات بروحها تتبع كي التوابلي تاكل العلف
في بلاد وين الطحين ما خلاشي بلاصة للصدف
في بلاد وين الطحين في بلاصة العلم يوصل للمناصب
لهنا القوادة لي توصل للمكان المناسب
في بلاد الاستعمار ما فما حد يحافظ على المكاسب
الشعب يموت بالجوع والمسؤول عمرو ما يتحاسب
تشوف المسؤولين في الدولة كيفاش تفكر
في كل بلاصة حطو صنبة باش يحاربو الفقر
بالسيف عليك لازمك تركع في بلاد الأصنام
في بلاد الباطل وين الحق محكوم بالإعدام
الشعب ولّا مخدر وعايش بلا طموح
العينين طايحة والعقل بالشيخة ممسوح
البدن طاح ومات قبل ما تخرج منو الروح
الدم نزف وشاح العباد ما عادش تتحمل جروح
هوني الحلم أكثر مالواقع ولا مخيف
العدالة والحقوق لكلها طلعت تزييف
شباب على جونتة يطيح كيما ورق الخريف
مازال يتضرب وأمو تتسب على بطاقة تعريف
لي يحكم ماهوش عارف الشعب شنية على ظهرو هاز
الي عامل كوردة ولي شعل حرق روحو بالغاز
يطلع رئيس الدولة بديسكور يحكي في التلفاز
الشعب اللوطة تذل وهو يحكي باعتزاز
الاقتصاد كي الرئيس واقف على عكاز
والشعب ينزف دم هوني يذبح كيف الكزاز
لي يحارب في الفقر كي البوكسور لي ماعندوش قفاز
خسرت العدالة و الحكم قال ان الضلم فاز
مشى الذيب لي حكمنا بعدو كلب جديد طلع
الصيد لي حطّوه يحكم البلاد طلع ضبع
جاب السراق ورمى في الحبس لي بالحق صدع
حكمنا في دوامة زلق فاها لهنا الشعب تزلع
السياسة الاقتصاد والتعليم كلها خدع
الميديا نشرت السم لي قتل المجتمع
الشعب ولّا كي التوابل يتبع تبع
ولا تيلي ولات كيما الفيروس تنشر و حد ما منع
تعرف قيمة الفكر وقتلي تشوف البرامج
ماتت العفة والقدر قعد كان الكلام الخامج
مهمة الإعلام نقل الخبر و الحقيقة
هوني يزرقو للشعب البهامة في زريقة
ساتيليت مالفوق خلى الشعب اللوطة مريض
كي الباطل غلب الحق العباد غرقت في الحضيض
في بلاد وين الحصان بقدرو و الزوالي يموت بالصقيع
خاتر الحصان مكالي ويحكي عليع المذيع
ايكرون صغير بكلمة وحدة خلى الشعب مال
البدن حر أما المخ مصفد بالأغلال
في بلاد الاستعمار لي طاحت مالسرقة والاستغلال
عايشين عبيد ويحتفلو بعيد الاستقلال
عيشو البلاد في خريف سرقوا منها الربيع
والشعب ماهوش عارف ياخو حقو لي قاعد يضيع
ما نحبش نعيش ذليل ونموت بين القطيع
عندي قلم ثار كي البركان ماهوشي مطيع
مازال يكتب في بلاد وين التهم تتلفق
وين الحكومة تنكح في الشعب وهو يصفق
قلم يحارب الذل لي في عروقهم يتدفق
بجمر لاهب يكتب للسلطة حكم موفق
مازال يكتب كلمات عالورقة قدر المستطاع
مايشيحش يقعد ديما يكتب بلا انقطاع
بعين ذابلة وبالبدن طايح وبالعمر لي ضاع
يبقى يكتب في بلادنا مادام الضالم يُطاع
قعدلي كان القلم كل مرة نكتب تيتر جديد
ينسيني في الواقع ويهزني لعالم بعيد
عالم مافيهوش قلوب باردة كي الجليد
فيه قلوب حية ما ترضاش تعيش عبيد
يهزني لعالم بعيد على القلوب الخائفة
على العقول الحائرة و الأحلام الزائفة
على القلوب لي ماتت كي الجثث فوق بعضها تتكدس
بعيد على العقول لي تعيش في الجهل المقدس

- psyco m lyrics

Random Song Lyrics :

Popular