opa | أوبا - mc amin lyrics
[اللازمة]
أوبا، أوبا أوبا أوبا
[المقطع الأول]
أنا دلوقتي ماسك الشنطة وطالع على أوروبا
من زمان بحلم أنا بيها
اللحظة ديا اللي أنا فيها
ضهري لأهلي إصحابي، دمعة محبوسة في عينيا
مش بفكر في أي حاجة غير الأيام اللي جاية
[اللازمة]
أوبا، أوبا أوبا أوبا
[المقطع الثاني]
قبل ما أجهز الشنطة عشان أروح أوروبا
أمي جهزتلي البؤجة ومعاها الشنطة
حطالي فيهم فطير ووزة وبطة
هطلع من تحت لفوق وهنط حتة نطة
وأروح هناك وأجيب فلوس كتير ومصاري
وأعيش حياتي فوق فوق فوق فوق في العالي
وما عادش فيه حاجة هتشغل بالي
أبقى كويس و مبسوط وأعيش حياتي بالمظبوط
وأنزل ديزني لاند وأشوف ميكي وبندق وبطوط
وأركب قطر حياتي بسرعة قبل ما يعدي ويفوت
وأروح هناك وأجيب فلوس كتير
وأسيب الوزة والبطة وشوية الفطير
وأعيش حياتي قشطة وأنسى الفول والمش
في كلامي مركزين ولا إنتو مش
مركزين ولا إنتو مش فاهمين
مية مرة قلت لما أم سي أمين يتكلم
تخليكو لكلامي سامعين
[اللازمة]
أوبا، أوبا أوبا أوبا
[المقطع الثالث]
أنا دلوقتي خلاص وصلت جوة أوروبا
ومشيت فى شارع طويل نضيف ما فيهوش زبالة
قلت مش معقول أكيد دا حلم دا إستحالة
ولقيت شباب شكلها ظريف وبنات دمها خفيف
واقفين جوة الڤتارين، طبعًا أكيد كأنهم قالعين
قلت شكلك هتظبط وتهيص يا واد يا أمين
[اللازمة]
أوبا، أوبا أوبا أوبا
[المقطع الرابع]
أول ما وصلت ومشيت في شوارع أوروبا
قلت لما أكمل لف وأخدلي جولة حرة
كان حلم حياتي من زمان أطلع من جوة لبرة
بصيت لقيت شباب شكلهم مش غريب
لقيت واحد بيقولي تعالى يا أمين، مش برضه عيب
لازم نعمل الواجب دا إحنا من نفس البلد
أنا قلت الواد دا مية مية أما حتة ولد
ومشينا مع بعضنا وسرحنا في الكلام
قالي عندي إنت هتقعد هتبيت تاكل وتنام
أنا هنا في البلد دي لاففها حتة حتة
قولتله قشطة يا صاحبي وأنا معايا وزة وبطة
قالي تمام يا مان، معايا إنت في أمان
هظبطك في الشغل هنا وهتاخد فلوس كمان
[اللازمة]
أوبا، أوبا أوبا أوبا
[المقطع الخامس]
بعد ما قضيتها مع صاحبي إللي قابلته في أوروبا
صحاني من عز النوم بالليل وإداني في إيدى سلاح
قالي علشان تاكل عيش لازم هنا تكون سفاح
قولتله بس يا صاحبي هي العملية دي أمان
قالي إنت مع أخوك يبقى إنت مع سوبر مان
نزلنا في حتة ضلمة معانا طبنجتين
للناس مثبتين، في جيوبهم إيدنا مادين
طلعنا ورق متين وبسرعة قمنا جاريين
في العربية إحنا ناطين
على دواسة البنزين، دايسين فاعصين طايرين
لازم نبقى هربانين
قولتله قشطة عليك يا صاحبي
قالي قشطة عليك يا أمين
[اللازمة]
أوبا، أوبا أوبا أوبا
[المقطع السادس]
بعد أول عملية ليا جوة في أوروبا
مرة ورا مرة، عملية وراها التانية
البلية بدأت تلعب والحياة بقت حاجة تانية
لحد ما جه فى يوم ولقيت صاحبي داخل معجون
قولتله هو اللي عمل فيك كدا عاقل ولا مجنون
قالي فكك يا صاحبي الدنيا دي سلف وديون
قولتله سيبلي الموضوع دا وهوريك دموع من العيون
لمينا نفسنا ونزلنا جري على العصابة
ما كانش ناقصنا غير حاجة واحدة هي الدبابة
وضربنا على بعض رصاص
لمينا حوالينا الناس
صاحبي قالي روحنا بلاش الناس دي مافيش عندها إحساس
لحد ما جه فى يوم ولقيت الباب بيتخلع
داخل علينا ناس كتير يخرب بيت الهلع
ببص لقيت صاحبي وشه جاب ألوان الطيف
كإن عزرائيل داخل علينا من الباب ضيف
فجأة سمعت صوت رصاصة طالعة من الماسورة
ببص فتحت عينيا لقيتني لسه في المنصورة
قلت دي بلدنا وإحنا هنا فيها عايشين
خليكوا مع كلامي، خليكوا مع إم سي أمين
[أوترو]
أوبا أوبا أوبا
أوبا، أوبا أوبا أوبا
أوبا، أوبا أوبا أوبا
إيه الأحلام دي يا عم
هتبقى شوربة
Random Song Lyrics :
- what i want remix - loopy lyrics
- go tell her now - tom odell lyrics
- pvthxlxgy - johnyboy lyrics
- se liga doidão (zé droguinha) - gangrena gasosa lyrics
- elsinore - the old ceremony lyrics
- addicted - drew noir lyrics
- only love - yao si ting lyrics
- coney island - hop along lyrics
- fine wine & chips - dey lyrics
- get right - blakk soul lyrics